Ang kasalukuyang Kalagayan ng Ating Wika

Kamakailan ay kinuha ng lahat ng mga nasa ikalawang taon sa Pilipinas ang NAT o National Achievement Test. Alam ng lahat iyan. Ang unang eksamen ay Filipino. Sabi ko, "Wow, maganda panimula ng araw." Dahil nga mahal na mahal ko ang wika, magandang panimula para sa akin ang eksamen sa Filipino. Kaya lang baliktad ang natunghayan ko. Nakita ko ang kasalukuyaang kalagayan ng ating wikang pambansa.

Maaaring sabihing iba nga ang kurso ng Ateneo sa Filipino ngunit alam pa rin naming mga Atenista kung ano ang tama at ang mali kahit iba ang aming pinag-aaralan. Natunghayan ko ang kasalukuyang kasadlakan ng ating wika. Mismong mga tanong sa mismong eksamen sa Filipino ay may karamihan ang pagkakamali sa balarila. Katulad na lamang ng nagka-ideya. Kailan pa ginitlingan ang salitang nagkaideya? Hindi naman pangngalang pantangi ang ideya upang maglagay ng gitling bago nito hindi ba? Hindi naman siguro upang maglagay ng impit dahil pareho namang patinig ang a at i. Kahit wala itong gitling ay mababasa mo pa rin siya bilang "nag-ka-i-de-ya."

Ilan na rin sa mga napuna ko ang pagiging bano ng mga gumawa ng eksam sa Filipino. Napakaraming mga salitang syokoy (sa m,ga 'di nakaaalam, salitang syokoy ang ipinantutukloy ni Virgilio Almario samga salitang Filipinong hinango sa inakala nilang Kastilang salin ng isang Ingles na salita) o mga pilit na salin ang aking natagpuan sa eksam. Ilan na riyan ang aytem, persweysiv, narativ, at marami pang iba. Kailan pa naging tuwirang salin ng item ang aytem? Maaari na lamang sanang tinukoy ang item bilang bilang hindi ba? Napuna ko rin ang mga uri ng akdang tinutukoy ng eksamen. Ilan sa mga ito ang narativ at persweysiv. Isang maituturing kong napakamangmang na salin ng mga salitang persuasive at narrative sa Filipino. Maaari naman sigurong isaling ang persuasive o to persuade bilang nanghihikayat na talata o akda. Maaari rin namang isalin ang narrative o to narrate bilang nagkukuwentong talata.

Sadyang nakapanlulumo ang kalagayang ito ng ating wika. Tumawag sa akin kinagabihan ang isang kaibigan at sinabi ko ang aking mga napunang ganito. Ano'ng kanyang sinabi? "Gano'n talaga 'pag Filipino!" Ganito na ba kababa ang tingin natin sa ating wikang pambansa? Nanggagaya nang pilit? Hindi ko sinasabing masama ang manggaya ngunit ang manggaya nang pilit at mali ay syempre, hindi tama!

Kung ang mismong mga nasa Kagawaran ng Edukasyon ay bano na nga sa Filipino, paano pa ang pinangangalagaan nitong kabataang siyang inaasahan ng naghihikahos na wikang ito?Talaga bang wala nang pag-asang yapusing muli nang lubusan ng lahat ng mga Pilipino ang tamang pamimilipino? Kailan darating ang panahong magiging isa na itong wikang itinuturing ng lahat bilang isang wikang pang-intelektuwal? Kailan? Depende sa atin yaon.

PATALASTAS: Abangan niyo 'yung salin ko ng The Valiant. haha. Wala lang.