"A Nation of Servants"

Dahil halos lahat e nagbibigay na ng kanilang pananaw sa ginawang kahayupan ng isang Hong Kongish writer, magbibigay na rin ako ng aking pananaw ukol sa bagay na ito. Una ko itong nabalitaan sa GMA Weekend Report, Linggo ng madaling araw, kanina pagkatapos ko manood ng Cool Center at bago ang Walang Tulugan. Siguro nga'y masakit na tawagin ang isang lahing may napakayamang kasaysayan bilang isang "Nation of Servants." Sa ating pananaw, bilang Pilipino, mali siya. Dapat siyang mag-sorry. Dapat siyang pugutan ng ulo! Makibaka!

Ngunit magsusulat ako ngayon bilang isang mamamayan ng mundo. Wala akong sinasabing mali ang tatawagin nating si Hong Kongish writer. Pero sa kanya lang ba dapat ibunton ang sisi? Wala nga ba tayong ibinigay na dahilan sa kanya para isulat niya ang gayon? May naging pagkukulang nga ba tayo?

Sa akin, masakit isiping sa dinami-dami ng mga nag-o-OFW sa ngayon, tayo pa ang nakukulangan ng manggagawa. Sa ikatlong baitang pa lamang, itinurturo na sa ating mga mumunting isipan ang terminong brain drain. Hindi ko masisising tawagin tayong "Nation of Servants" kung taun-tao'y ang inaatupag ng DOLE at ng Malacañang ay ang pag-e-export ng mga tao sa ibang banda para pagtrabahuhin imbes na gumawa ng paraan para magkaroon ng mas maraming trabaho rito sa Pilipinas!

Ikalawa, 'wag mong ipamumukha sa mga Tsinong, "'Wag mo kaming mamaliitin! Pinoy ako!" kung ikaw mismo'y ikinahihiya mo ang balat mo. Isang Herdy Yumul ang nagsulat noon sa Internet tungkol sa kung sino ba'ng nais maging Pilipino. Itinanong daw niya ito sa isang konggregasyon sa isang pagtitipon ng mga mag-aaral sa Asya noon. Lahay daw ay umoo. Tinawag niya ang lahat ng mga taong iyon bilang mga ipokrito. Sino ba naman daw ang magnanais maging Pilipino sa kabila ng dinaranas ng bansa ngayon? Siya pa nga mismo'y ninanais na maging ibang lahi. Sige, kung ihaharap mo ang sarili mo kay Hong Kongish writer samantalang si Herdy Yumul ang nasa likuran mo, ano'ng mukha pa ang ihaharap mo?

Isa namang Amerikanong naninirahan na sa bansa ang nag-post sa bobongpinoy.com ukol sa problema ng bansa. Siguro maaasahan ko ang kanyang pananaw dahil ibang pagtingin ang kanyang nakikita, isang pagtingin bilang isang banyaga. Sa ilang taon niyang paninirahan sa bansa, nakita niya ang kawalan ng pagmamalaki ng Pilipino sa kanyang sarili. Isa pang malalang kondisyong kanyang nakita ay ang 'di pagkakakilala ng Pinoy sa kanyang sarili. Tama! Ilan nga naman bang Pilipino ang may alam kung gaano kadesperado noon ang mga Amerikanong dakpin si Aguinaldo para sugpuin ang naging unang republika sa Asya? Sa kabila nito'y patuloy pa rin nating sinasamba ang mga "stateside" na mga produkto! Sino rin ba ang nakaaalam na bago pumunta ang banyaga rito upang turuan tayo kung paano magbilang hanggang sampu ay marunong na ang mga katutubong magbilang hanggang isandaang milyon at magdagdag, magbawas, maghati at magparami (add, subtract, divide and multiply).

Ikatlo, hindi ko sinasabing tayo lang ang may mali sa bagay na ito. Isa pang kakatwang paghahabol ng Tsina sa Spratly ang napuna ko. Sino ba namang naghahabol ang magpiprisinta ng mga dokumentong inamag na sa aparador na nagmula ma sa Ching Dynasty? Maaaring noong sinaunang mga panaho'y kanila nga ang Spratlys ngunit ang tanong, "Kanino ba ito sa ngayon?" Malinaw sa ipinagkaloob na Economic Zone sa Pilipinas ng UN noon na kasama nga ang Spratlys sa zone na iyon. Kanino ito sa ngayon? Sa atin pa ring mga Pilipino. Muli pa ngang pinagtibay ng Konggreso ng Pilipinas ang ating kapangyarihan sa Economic Zones na ito sa pamamagitan ng pagtatatag ng Philppine Economic Zone Authority o PEZA. Hulyo 25, 1994 nang nilagdaan ang Republic Act No. 7916 na naglalaman ng pagkakatatag ng PEZA at naglalaman ng mga alituntuning susubaybay rito at ang mga kagamitan ng nasabing itinatag na organisasyon. At kailan lang ba nila sinabing kanila ang mga islang ito? Kung kailan nalamang may napakayamang deposito ng langis sa ilalim nito? Bakit 'di kaya nila ito hinabol dati pa? Ano'ng nagpainteres sa mga Tsino? Malamang ay ang kanilang kikitain sa langis! Siguro nga'y naiinggit lang sila dahil lahat ng deposito ng langis sa Timog-Silangang Asya ay sa Pilipinas natagpuan. Sadyang nakakatawa lang dahil maghahabol na nga lang sila, bad timing pa. Kung ako sa kanila, patatagalin ko muna nang kaunti pa dahil kung ngayon ako maghahabol, pagtatawanan lang ako ng marami dahil obvious na obvious kung ano lamang ang aking habol.

Siguro nga malaking insulto sa atin ang isinulat ni Hong Kongish writer. Sumasang-ayon ako sa paghingi ng kanyang public apology at talagang kailangan niyang humingi ng paumanhin dahil sa idinulot niyang kasiraan sa ating lahi. Ngunit sana'y makita rin nating isa na rin itong paalalang punan ang ating sariling pagkukulang. Ang mga pagkukulang na ito rin kasi ang nagbigay-dahilan sa kanya upang isulat ang gayon. Pinoy! Gumising ka sa katotohanan! Oras na upang ipagmalaki mo ang iyong sarili! Oras mo na para ikaw naman ang tumayo sa tuktok ng mundo, yukuran ang iba pang mga bansa at masabi mong, "Pilipino ako! Laban ka?!"