'Talban! 'Talban! Tara na, sakay na misis!

Nagpunta kaming Araneta Center kamakailan. Sige na, Cubao na kung mas maraming may alam no'n. Pareho lang 'yon. Katatagpuin dapat namin ang isang kasamahan ni Tatay na may ibibigay na padala sa amin. Wala kaming makitang FX na biyaheng Cubao kaya nag-Katipunan LRT na lamang kami. Habang papunta kami, sa FX, nagtatalo kami ni nanay. Ano''ng dapat gawin pagdating sa Katipunan? Mag-e-FX ba ulit kami o mag-e-LRT na lamang? Sabi ko, mas mabilis ang LRT. At dahil nga mapilit akong tao at gusto kong masunod ang gusto ko datapwat kinkontra ako ni nanay, nag-LRT kami. Dose pesos ang tiket. diyes naman 'pag FX. Hayaan mo na't mas mabilis naman ito. Kaya lang nasira 'yung makinang lumuluwa ng tiket. Magaling. Lumipat pa kami sa ibang makina. Naghihintay na kami ng tren nang mahulog si nanay sa riles habang paparating na ang tren. Syempre, hindi 'yon totoo.

Pagdating, ang inakalay ko'y bababa kami mula LRT station patungo sa isang napakalamig na Gateway mall. Hindi naman pala. Binabaan namin ang isang kalyeng pinasisikip ng malalaking poste ng LRT station at dalawang malaking gusali sa kabilang bahagi ng kalsada: Gateway at Isetann. Eto na nga ba ang sinasabi ni nanay. Kung nag-FX sana kami, bumaba na kami sa Alimall ('yung meeting place namin). Isang kilometro ang nilakad namin at nakarating naman kami sa Alimall nang matiwasay. Nakaistambay ang isang mag-asawa roon sa pintuan. Sila na pala 'yon. Kumain kami, kaarawan pala niya. Nalibre kami ng spaghetti, fries at coke sa KFC na may libre ring pampatuyo ng pawis: aircon.

Naglibot kami pagkatapos, syempre. Nagulat ako. Ang uugod-ugod nang SM Cubao, napagkamalan kong SM Marikina ang loob. Nawala na rin ang malalamig at butas-butas na upuan sa Food Court nit osa ilalim at ang mga kiddie rides na sinasakyan ko pa noong bata ako 20 taon na ang nakalilipas. Pero naghanap ako ng National, wala. Kaya tumungo kami sa Alimall. Lupit! Ang dating pinagtatawanan-ng-2M na Alimall ay unti-unti nang nag-iiba ng wangis. Mayroon nang bumungad sa aming tandem ng Starbucks at Dairy Queen. Ang tandem na ito'y sa Eastwood ko lang noon naratnan. Pagpasok sa sira pang pinto ay ang nire-renovate na loob nito. Akala mo'y miniature model na ng Mall of Asia o copy cat ng Gateway ang loob. Maaliwalas na at wala na ang kulay dilaw na mukhang caution na Alimall. Ito siguro ang matatawag kong "rebirth of the first shopping district in the Philippines."

Ngunit ang mga tanawing ganito ay nakapang-aakit ng ating mga mata. Maraming walang trabaho sa Maynila kaya't kumakapit na tayo madalas sa patalim. Marahil marami ngayong susubok na makapasok sa Araneta Center dahil sa pagbabagong ito. Ngunit ang malaking tanong, gusto mo ba talaga ang ginagawa mo? O talaga lamang naakit ka sa kagandahan ng lugar? Maraming mga Promdi ang tumtungo sa Maynila para lamang makapagtrabaho. Saan ang kanilang bagsak? Squatter's Area, Estero, Ilalim ng tulay. Mapang-akit ngang talaga. 'Wag kang masyado paakit.

Pauwi na kami at mahirap palang makahanap ng FX sa sakayan sa may Cubao. Puro jeep. Nakakita si nanay. Colorum nga lang at hindi talaga FX. Adventure siya at napakalamig ng aircon. Tinabi ang sasakyan, nakapagtataka. 'Yun pala, may "kalaban" o "parak." Kunyari na lang daw, kamag-anak namin ang nagmamaneho. Sa mga panahong inilagi ko sa pagsakay sa FX, ngayon ko lang siguro hindi naranasang antukin. At kung mayroon lamang award para sa pinakamakukulit na driver at barker sa mundo, ang mga nasakyan na namin ang panalo.

PAgdating namin sa may Barangka, huminto si Kuya Driver at nagtanong, "Miss, san 'yung papuntang Loyola Subdivision?" Sa kaliwa raw. "Ando'n ba 'yung munisipyo?" Oo na lang daw. "Ah, may munisipyo na pala ro'n? Salamat!" Buong akala ko'y 'di talaga alam ni Kuya ang daan. Nanggago lang pala. Kailan nga naman napunta sa Loyola Subdivision ang munisipyo ng Marikina?

"'Talban, 'Talban!" ang sigaw ni Kuya Barker. Kung ayaw sumakay, "SS! SS! Ayaw niyong 'Talban e!" Sigurado ka nga ba sa sasakyan mo brad? Montalban ba talaga 'yan o SS? O baka naman sasakay ka lamang dahil maganda ang minamaneho ni Kuya, Adventure? 'Pag sumakay ka ba, sigurado kang tutungo ka sa kaginhawaan? O hahantong ka lang sa pagtira sa ilalim ng tulay, gilid ng riles, Squatter's area o sa may Ilog Pasig? 'Wag kang palinlang kung maganda ang nagyayaya sa'yo upang sumakay. 'Talban ba talaga 'yan o SS?